മഴ

_____മഴ

മണ്ണിൻറെ വരണ്ട മനസിൽ
അമൃതിൻ തുള്ളികളായ്
പെയ്തിറങ്ങുന്നു മഴ ...
ആകാശ ത്തെയും
ഭൂമിയെയും
ബന്ധിപ്പിക്കുകയാണോ
മഴനൂലുകൾ .....
മാമ്പൂ മണക്കുന്ന
നാട്ടിലേയ്ക്ക് ഈ മഴത്തുള്ളികൾ
എന്നെ കൈ പിടിക്കുന്നു
മഴയോടൊപ്പം
ആടിയുലഞ്ഞ് വരുന്ന
കാറ്റ് തന്നു പോയ
നാട്ടു മാമ്പഴങ്ങൾ .....
പുഴയുടെ മാറിൽ ചിതറി വീണ
മഴത്തുള്ളികളെ നോക്കിച്ചിരിച്ച
കൌമാരത്തിനുമപ്പുറം
പാവാടത്തുമ്പിൽ
ഇലഞ്ഞിപ്പൂക്കൾ
പെറുക്കിയെടുത്ത്
മാല കോർത്തിരുന്ന
ബാല്യ നിഷ്കളങ്കതയുടെ
നാളുകളിലാണ്
മഴ ഒരു ലഹരിയായ്
മനസ്സിൽ പടർന്നത് ..