ഒരു ദിനം

ഒരു ദിനം

ഇനി വരും കാലത്തിലെങ്ങാനുമൊരുദിനം
ഇതിലെ വന്നീടുമോ പ്രണയമേ നീ ..........
ഇവിടെ നിൻ‍ സ്നേഹക്കടംബിൻറെപൂവുണ്ട്
ഇരുളുന്ന രാവിനെ പ്രണയിച്ച പകലുണ്ട്
രാവ്പാടുന്ന രാപ്പാടി ചിന്തുണ്ട്
കരളിൻറെ കാമ്പ് കടഞ്ഞിട്ട വാക്കുണ്ട്
കിളിയുറങ്ങാ മഴക്കാടുമുണ്ട് .

സ്വപ്‌നങ്ങൾ മേഘ ചിറകുകളിലേറി
ചക്രവാളങ്ങൾ ‍ തേടും കാലം...
കാലം ചുരുങ്ങിപ്പോയ്നമ്മളിലേയ്ക്കന്നു
വാനമുഡുക്കളുംസാക്ഷിയായി

കത്തുന്ന സൂര്യനായ്തെളിയും നിലാവായ്
നുരയുന്ന വീഞ്ഞുമായ്നിൻ‍ പ്രണയം ...

കളം മാറിക്കളിക്കുന്ന കാലമാം മാന്ത്രികൻ
ഇരുളുന്ന ജീവിതനേർ‍ക്കാഴ്ചകളോരോന്നായ്
നിരനിരയായി നിരത്തിവയ്ക്കേ,
കൂട്ടിക്കിഴിക്കലിനൊടുവിലായന്നു നാം
വേറിട്ട യാത്രതുടങ്ങിയ വേളയി-
ലൊരു നാളൊരു സൗവർണസന്ധ്യയിൽ
നീയെന്ന പ്രണയസുധാരസമൊഴുകിപ്പോയി...
ഇനിയും പിറക്കാത്ത സ്വപ്‌നങ്ങൾ കൂട്ടി നീ
മഴവില്ലിനൊപ്പം നടന്നു പോയി .........

ബധിരകർ‍ണ്ണങ്ങളിൽസംഗീതമെന്ന പോൽ ,
വിരലില്ലാ കൈകളിൽ വീണകളെന്നപോൽ ‍ ,
തിരിയുമീ ജീവിത ചക്രംതിരിച്ചു ഞാനിവിടെയീ -
ക്കോണിലന്തിച്ചിരിക്കുന്നു....

ഇനി വരും കാലത്തിലെങ്ങാനുമൊരുദിനം
ഇതിലെ വന്നീടുമോ പ്രണയമേ നീ ....