ഇലകൾ
സർവം സാക്ഷിയായ സൂര്യനടക്കം
പ്രപഞ്ചത്തിലെ
ചരങ്ങളും അചരങ്ങളു മായതെല്ലാം
കാലത്തിൻറെ കണക്കൊപ്പിച്ച്
കൊഴിയാൻ വിധിക്കപ്പെട്ടിരിക്കുന്ന
ഇലകൾ മാത്രം ........
വരാനിരിക്കുന്ന വസന്തത്തിനു വേണ്ടി
പൂക്കൂടകൾ നെയ്തൊരുക്കുമ്പോഴും
ചില്ലകളെ നൃത്തം പഠിപ്പിക്കുന്ന
കാറ്റിനോട് സല്ലപിക്കുമ്പോഴും
അറിയുന്നില്ല
ഇലച്ചാർത്തിൻറെ വിടവിൽക്കൂടി
ഒഴുകിവരുന്നത്
ഇരുളിൻറെ നേർത്ത തുള്ളികളാണെന്ന് ....
ചില്ലകളിൽ വെയിൽ പൂക്കുന്നതിൻറെ
ആഹ്ളാദത്തിമിർപ്പിൽ ,
മരത്തെ അതിജീവിപ്പിക്കുന്നത്
താനാണെന്ന അഹംബോധത്തോടെ
നിൽക്കുമ്പോഴായിരിക്കും
കൊഴിയാനുള്ള സമയമെത്തുന്നത് ......
പിന്നെ
ഋതുഭേദങ്ങളുടെ നിശ്വാസങ്ങളറിയാതെ
മണ്ണിൻറെ മടിയിലേയ്ക്ക് ....
ചില്ല വിട്ട് കൊഴിഞ്ഞു പോരുമ്പോൾ
ഇല എന്തായിരിക്കും
വൃക്ഷത്തോട് പറയുന്നത് ....
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ
Comments